चौपाई छंद..
*भिलाई के गैस दुर्घटना*
सुनौ भिलाई के नव घटना।
गैस सिलेंडर के हे फटना।
दुख पीरा मा मनखे मर गे।
कइसन देखौ मनखे जर गे।।
कतका पीरा ल गोहरावौं।
हर घर रोवत चींखत पावौ।
मनखे के जिनगी ला जानौ।
करौ सुरक्षा अतके मानौ।।
लापरवाही काहे करना।
सोच समझ सब यंत्र जतनना।
देख प्लांट के गड़बड़ झाला।
जर के मनखे होगे काला।
रात-रात भर सेवा करथे।
जिनगी के भय ले ओ लड़थे।
कतका दुखदायी गा सुनलौ।
ध्यान धरौं अउ जिनगी गुनलौ।।
बड़े प्लांट मा कतका खतरा।
खून बहावय कतरा कतरा।
दाई लइका अउ घरवाली।
आँसू होगे ओखर खाली।।
अपन कोन चिनहत नइ हावै।
जरे मरे घर कइसे लावै।
कतका जर के होगे काला।
कइसे हो घर द्वार उजाला।।
देख सुरक्षा ध्यान धरौ गा।
जिनगी बाचे काज करौ गा।
जिनगी हे अनमोल बचादौ।
दुर्घटना ला दूर भगादौ।।
