बरवै छंद

बरवै छंद-श्रीमती आशा आजाद

पानी के कीमत ला जान

पानी के कीमत ला,मनखे जान।
     फोकट झन फेकौं जी,हवे परान।।1

बूँद बूँद ला राखव,जतनव रोज।
     कीमत नइ जानहूँ,करहूँ खोज।।2

बुरा समय ला जानौ,करलौ काम।
     प्यासा पीये मनखे,लेवय नाम।।3

जग के हित मा पानी,सबो बचावँ।
      गुनलव पानी ला झन,जान गवावँ।।4

कतका पीरा होवय,तँय ये मान।
      रोवत बिलखत हे सुन,खोय परान।।5

गंदा पानी पीये ,कतका रोय।
       कतक बिमारी मा सुन,तन ला खोय।।6

चेत धरौ सब मानौ,मोरे गोठ।
       जिनगी बचही कहिथौ,मँय हा पोठ।।7

रचनाकार-श्रीमति आशा आजाद
पता -मानिकपुर कोरबा छत्तीसगढ़