छन्न पकैया छन्न पकैया, छत्तीसगढ़ी जानौ।
किसम किसम के रोटी पीठा ,सुग्घर एला मानौ।।
छन्न पकैया छन्न पकैया,लाटा अब्बड़ भाये।
गुड़ के संगे अमली डालौ,चाट-चाट सब खाये।।
छन्न पकैया छन्न पकैया,चटनी मा खा चीला।
बेसन के कड़ही तयँ खाले,दिखँय पीला पीला।।
छन्न पकैया छन्न पकैया,चाउँर अरसा खाले।
अब्बड़ गुलगुल मीठा लागँय,गुन ओखर तँँय गाले।।
छन्न पकैया छन्न पकैया,अंगाकर ला जानौ।
परसा पाना ले बन जाथे,एखर गुन ला मानौ।।
छन्न पकैया छन्न पकैया,स्वाद फरा के जानौ ।
नून दूध मा एहा बनथे, नून-चूरहा मानौ।।
छन्न पकैया छन्न पकैया,उरिद दार मा बनथे।
बरा सबो ला अब्बड़ भावय,जम्मो ऐला चखथे।।
छन्न पकैया छन्न पकैया, बोरे बासी खाले।
सुरुट सुरुट तयँ पीले पानी ,मिरचा चटनी डाले।।
छन्न पकैया छन्न पकैया,दही मही ला जानव।
जिमी कांदा अम्मटहा म,अबड़ मजा मा खालव।।
छन्न पकैया छन्न पकैया,दही मही ला जानव।
जिमी कांदा अम्मटहा म,अबड़ मजा मा खालव।।
रचनाकार-श्रीमति आशा आजाद
पता-एसइसीएल मानिकपुर कोरबा( छ.ग)
No comments:
Post a Comment